اتجوزت وكنت في غربة، ما كانش في أي حد معايا غيره هو وأهله.
كنت لوحدي يُعتبر يعني، ما كانش ليا غيرهم.
هم الـلـي يعتبر كسروني كلهم.
بعد 5 سنين جواز، قررت إن لأ كده كفاية،
ما ينفعش إن أنا أكمِّل أكتر من كده.

المدرسة، الأمومة، الزواج، الطلاق، الوالدين، العمل

اتجوزت بعد تخرجي بشهور قليلة
ما وصلـتـش لمرحلة النضج الكاملة إني افهم يعني إيه جواز وبيت
اتصدمت بشخص تاني بعد الجواز، شخص مريض نفسي
بعد تلات أيام من الزواج، بدأ في ضربي
وسب، وتخوين، ومعايرة
بهدلني بكل ما تحمله الكلمة من معنى.

 اتعلمت أحبه مع الوقت، 
وانا بـ شوفه بـ يكبر قدامي، 
وبـ يتعلم الكلام، 
وبـ يتحول لشخص عنيد، 
وذكي، وفنان، ودمه خفيف.

الضغوط الاجتماعية، العلاقات العاطفية، الأمومة

أنا كنت سبَّاحة، وبشرتي كانت غامقة؛
بسبب إني بـ نزل أعوم الصبح،
وشعري أنا الوحيدة الـلـي في العيلة كيرلي.
كان لازم كل يوم أسمع كلمتين بسبب لوني أو شعري،

علاقتي بأمي كانت كلها مأساة….
أمي كانت دايمًا بـ تعمل نفس الحاجة، تتريق على شكلي عمومًا،
مش بس الوزن، مع إني عمري ما كنت تخينة قبل ما أتجوز.
بس كانت دايمًا تقولي: "أنتِ شبه البوابين".

كنت يا دوب كسرت التلاتين
بس من 15 سنة فاتت،
ما كانش لسه سن التلاتين من غير جواز عادي.
كان كل فرح أروحه لازم خالاتي ولا عماتي يقولوا لي:
"عقبالك يا حبيبتي، ربنا يجبر بخاطرك ونفرح بعوضك"
بنظرة الانكسار دي الـلـي كلكم عارفينها.

خايفة أخلف
خايفة على ابني أو بنتي من البلد الـلـي احنا عايشين فيها
"يالا خلفي"
"أنتِ ليه مش عايزة تخلفي؟"
"كشفتي ولا لأ؟"

ماما، هـ يكون إيه إحساسك لو عرفتي أنا حاسة بإيه ناحيتك؟
أنا ما بحبكيش، ومش عايزة لما أكبر أكون شبهك.
أنتِ مش أحسن أم في الدنيا، حتى لو أنتِ متصورة كده.

الأمومة، الوالدين

بصي، أنا كنت مُبرمجة أصلاً،
من وقت ما اتخرجت، اشتغلت سنة واحدة بس في وظيفة ثابتة.
بعدين قررت إن أنا هـ بقى فري لانس،
عشان لما اتجوز اشتغل من البيت.
خصوصًا إن أولادي كانوا لسه صغيرين يعني،
كان لسه ابني بيبي،
فـ كان لازم أكون معاه غالبية الوقت، هـ سيبه فين بقى؟
الأمومة، العمل

أنا متجوزة من 10 سنين
وبـ عاني من قبل جوازي من مرض في الرحم
منعني من الإنجاب، وخلَّاني أعمل أكتر من جراحة على أمل إني أبقى أم … غير إنه كمان المرض بـ يسبب مشاكل صحية تانية
بسبب كده، بـ حس إني ست درجة تانية