نوم طول الوقت، أو مفيش نوم لأيام
عياط وماليش نفس لحاجة، لأي حاجة، حتى النَفَس نفسه مش طايقاه
مش عارفة أشوف شغلي
مش طايقة أي حد
بـ اسقط في دراستي كتير، بـ اخسر صحابي
مش لاقية حد يفضل، وعندهم حق
أنا مش قادرة أفضل معايا.

من تلت سنين فاتوا في نفس يوم موت صديقتى المفضلة والأقرب لقلبى،
خرج خطيبى وحبى الأول من حياتى برسالة بعتهالى على واتساب بدون مقدمات:
"أنتِ جميلة وتستاهلى حد أحسن منى، خلى بالك على نفسك علشان خاطرى"
بكل بجاحة حلفنى بخاطره علشان أحافظ على نفسى فى أكتر وقت كان ممكن أكون محتاجاله فيه.
حاولت أتواصل معاه ورفض ومن يومها ما أعرفش عنه حاجة

انا بـ يفوت عليا أيام بـ نام فيها ساعات طويلة جدا
وبـ تحرك بتقل وصعوبة شديدة
وبـ آكل كل الوقت
وفجأة، تفوت أيام بـ نام قليل جدا
وآكل قليل جدا
واخلص كميات شغل رهيبة في وقت قصير جدا
وبـ تحرك بين الأماكن بسلاسة وطاقة.

في حاجة بـ توجع
حاجة ضيَّعت إحساسي بكل حاجة
حتى أقرب الحاجات لقلبي بطَّلت أعملها
بقيت بـ عمل كل حاجة لأنها مفروضة عليا

أول مرة مد إيده عليا كنت لسه عارفة إني حامل يومها،
اتخانق معايا عشان كان صاحبه ومراته جايين يـ تعشوا معانا، وحمَّرت الممبار بعد البانيه.
جابني من شعري لحد البوتاجاز، وقالي إنه هـ يولع فيا عشان يخلص مني.
سِكِت عشان كنت حامل، واتصالحنا.

أبويا كان بـ يموتني من الضرب من وانا صغيرة، ولحد سني ده
أخويا استقوى عليا منه، وبقى يـ موتني من الضرب بسبب تافه، أو من غير أي سبب

رحت للدكتورة وقلت لها إني حاسة إن في خرم جوايا
اديني أي حاجة... أنا مش مبسوطة كده.
حاسة كأن حد دخل إيده جوايا وأخد حاجة ومشي
فيه فراغ جوا بيوجع... بحس بيه كل مرة بحاول أبلع أي حاجة

الاكتئاب، الصحة النفسية، الانفصال، العلاقات العاطفية

أنا بـتعرض لـتـنـمُّـر وإهانات
زي إن مرة مدرس مادة الدين قعَّدني قدامه بطريقة غير مباشرة عشان يقرا عليا الرقية الشرعية، قدام كل الـ classmates
وكان متِّفق معاهم عشان شايفين اختلافي عنهم خلل
وما أقدرش أعمل حاجة
ولما اتكلمت، اتقال ده هزار.

حتى إنها كانت بـ تنام في حضني وانا عندي مدرسة تاني يوم الصبح بدري،
وكل شوية كنت أصحى على عياطها أحاول أسكتها
أو أدخلها غرفة أمي اللي كان ممنوع ينام فيها أطفال علشان بابا بـ يزهق من زنهم
وكنت أفضل مستنية لحد ما ماما ترضعها علشان تكمل نوم جنبي

خـلِّـفـت أول طفل ليا
 كنت بـ سمع عن اكتئاب بعد الولادة
بس كنت بـ فتكره بـ يـيـجي عشان شكل الجسم بـ يـتـغـيـر
بس لما عشت التجربة، عرفت إنه أسبابه أكبر من كده بكتير
حسيت إني في مرحلة مقابلة الوحش المستوى الأخير يعني.
الصحة النفسية، الأمومة، الاكتئاب، الوصمة