من وانا في اعدادي في المدرسة وانا عندي مشكلة كبيرة مع الحبوب في وشي،
وروحت لدكاترة كتير، بس دايمًا الحل بـ يكون مؤقت، وبـ يرجعوا تاني،
لدرجة إني ساعات ما بـ عرفش أنزل الشارع أو أقابل حد؛ عشان شكلهم وِحِش.
الجسم، التنمر، معايير الجمال

بابا كان بـ يضربني علشان أنا تخينة.
وانا 13 و14 سنة، ماما كان عندها يقين إني مش هـ تجوز
علشان أنا مليانة.

"منكوشة"
"تحبي أجيب لك مشط؟"
"ماله ده؟ ما بـ تـسـرحـيـهـوش ليه؟"
"متكهربة؟ معلش"
"في دكتورة شكلها كده؟"
"يا حبيبتي سرحيه، ده يلم حاجات كده"

وزني زاد وانا بـ كبر،
وكنت طفلة كل ما طنط من قرايبنا تشوفني تقولي: "أنتِ تخنتي"،
وانا مراهقة ماما كانت بـ تنتقد وزني طول الوقت،
وتلبسني على مزاجها أكبر من سني،
ومحدش خد باله إني كنت منعزلة وحزينة.
الجسم، التنمر، العائلة

أنا عندي ٢٤ سنة
من سن ١٣وانا فـقدت ثقـتي في نفسي بـ سبب إني تخين،
بعاني من نظرات الناس ليا، أوقات كتـير بـ تعاير إني تخين
"انت اللي هـ تـرضع العيال لما تتجوز؟"

شعري طول عمره مجعد، وزمان وانا صغيرة كنت متعقدة منه جدًا
وكنت بـعتبر إن فيا حاجة غلط
لدرجة كنت بـ صلي وبـدعي شعري يـ تفرد
لما كبرت بدأت أتصالح مع شعري

أنا مولودة عندي قورة كبيرة، والـلـي زود الموضوع إن شعري خفيف من قدام، وشبه دماغ محمد هنيدي كده قبل ما يزرع شعر
كنت دايمًا بـ لاقي تريقة من قرايبي ومن صحابي فـالمدرسة، ومن أهلي نفسهم
لما بــ لـم شعري لورا، ألاقي بابا يقول لي:
"ما تحطي شعرك علي وشك يا بنتي، إيه القرف ده؟"

صحيت في يوم رايح المدرسة زي أي يوم عادي،
لاقيت الناس كلها بـ تـتـريق عليا عشان أنا لابس أكبر تي شيرت،
وأكبر بنطلون ووزني زايد عنهم،
ما تسألنـيش الموضوع ابتدى إزاي عشان أنا نفسي مش عارف …

طول عمري بـ سمع تعليقات على جسمي؛
"أنتِ تخينة"، أو "شبه الدولاب"، دايمًا،
وأصلي لازم أخس عشان أتحب، أو عشان اتقبل عمومًا.
جربت كل أنواع الدايت،
وكرهت نفسي من كوني مش عارفة ولا قادرة أخس،
ابتديت أصدق الكلام ده عني، مش قادرة أحب شكلي ولا جسمي
الجسم، التنمر

أنا بـتعرض لـتـنـمُّـر وإهانات
زي إن مرة مدرس مادة الدين قعَّدني قدامه بطريقة غير مباشرة عشان يقرا عليا الرقية الشرعية، قدام كل الـ classmates
وكان متِّفق معاهم عشان شايفين اختلافي عنهم خلل
وما أقدرش أعمل حاجة
ولما اتكلمت، اتقال ده هزار.