أنا عندي اضطراب نهم الطعام -binge eating disorder- من وانا طفلة،
ما بدأتش أوعى له أو آخد خطوة في إني أعمل حاجة فيه إلا لما بقى عندي 21 سنة.
وبدأت أزيد في الوزن من وانا عندي 10 سنين،
غير إني كنت كل أسبوع عند دكتور تغذية،

كرهت بشرتي؛ بشرة فيها كل العيوب….
وشي وضهري فيهم حبوب مؤلمة،
أماكن غامقة، وحمرا، وحُفر، وبُقع.
نظرة الناس بـ تقرفني، وخصوصًا لو نفسيتي تعبانة،

من وانا صغيرة كانوا مفهميني إني شعري مش حلو….
بـ عمل فرد لشعري من ابتدائي،
كل الـلـي حواليا كانوا بـ يتريقوا عليا، ويقولوا عليا كارتة.
فضلت أعمل شعري فرد لحد ما بقى عندي 24 سنة،
يعني حوالي 14 سنة بـ فرِد شعري.

أنا بشرتي سمراء، وبحبها جدًا، ومن مصر، وأصلي نوبي، بس مش عايشة هناك.
بس عمري ما خلصت من تعليقات الناس في الشارع، أو المدرسة،
أو أي مكان بـ روحه،
زي: "شيكابالا"، "أعوذ بالله"، "هي مالها محروقة كده ليه؟"
العنصرية، التنمر، معايير الجمال، الجسم 

اتولدت بنت مُشعرة، ورجلي كبيرة، وشكلها وحش.
طول عمري بـ سمع كلام من أهلي، إن يا عيني أنا مُشعرة،
كأن عندي مرض مثلاً، فاللي هو يا عيني عليها، هـ نعملها إيه؟

ببساطة أنا بنت، بس عمري ما بـ قعد قدام أي حد بشعري
حتى في البيت، حتى وانا نايمة، حتى وانا خارجة من الحمام
في كل وقت لابسة طرحة على شعري
عشان كمية الإساءات الـلـي بـ سمعها
ونظراتهم ليا "أنتِ شعرك خشن"

أنا بقى موضوع الهالات السودا ده عاملي عُقدة كبيرة في حياتي،
كل ما أصاحِب ناس أو أتعرف على حد جديد في حياتي،
يقولي: "انت بـ تضرب إيه؟"،
والـلـي يقولي: "طب مفيش سيجارتين ولا حباية على الماشي؟"

أنا بـتعرض لـتـنـمُّـر وإهانات
زي إن مرة مدرس مادة الدين قعَّدني قدامه بطريقة غير مباشرة عشان يقرا عليا الرقية الشرعية، قدام كل الـ classmates
وكان متِّفق معاهم عشان شايفين اختلافي عنهم خلل
وما أقدرش أعمل حاجة
ولما اتكلمت، اتقال ده هزار.

أنا ولد، ومن صغري عندي موضوع التثدي "كبر حجم الثدي عند الرجال"،
كنت على طول بـ قنع نفسي إنه مش حاجة كبيرة، وكلها كام سنة ويروح،
وللأسف الموضوع ده دمرلي فترة مراهقتي،
ومش ناسي كل واحد وانا بـ كلمه، وهو بـ يبص على صدري.

أفتكر في أول سنين المراهقة كده، كنت في مصيف مع أهلي، ووزني كان زايد 2 ولا 3 كيلو،
ماما من يومها وهي كل يوم تعلق على وزني وشكل جسمي.
الجسم، الوالدين، التنمر