كنت عارفة موضوع الختان من أصحابي البنات في مدرسة ابتدائي،
كانوا بـ يتكلموا بينهم كلام سري ومتقطع،
ومحدش بـ يقول بشكل صريح،
بس عرفت في الآخر من واحدة صاحبتي إنهم بـ يقطعوا مني جزء؛
عشان الست ما تكونش شبه الراجل،
وإن جوزها بـ يعرف بعدين إنها ما اتطاهرتش.

اتعرضت للختان وانا في سنة سادسة ابتدائي،
وكنت واعية لـلـي بـ يحصل وفاهمة،
وحاولت أقول لأمي، بس هي كانت سلبية، وما اهتمتش،
مع إنها أكتر واحدة كانت بـ تشتكي من العلاقة الحميمية،
وقد إيه إنها مالهاش لازمة للست.
العنف المبني على النوع، العنف الجسدي، الختان، الجنس

بس بـ قولك إيه، سـيـبـيـه هو يـ تصرف، آه
أوعي تقولي له آه ولأ
الست عندنا ما بـ تـتـكـلـمـش في الحاجات دي
بـ تقول حاضر، ونعم بس.

ما كانش علي أيامي إننا نكشف،
هو احنا كان لازم نعمل الطهارة وخلاص.
كنت في 2 ابتدائي،
والله العظيم أمي آه كانت ممهداني ليها وهـ نعمل إيه، وهي حاجة صغننة زي شكة الدبوس،

كنت بـ سمع ناس من عيلتي بـ يحكوا
مش عارف مين اتربطت في السرير، علشان قالت لأ
ومين دخلوا فيها إيه، علشان قالت لأ
مش عارف مين ودوها المستشفى في الصباحية، علشان حصل لها نزيف.

في العيلة عندي مش مقبول ولا مسموح إن البنت ما تبقاش بنت قبل الجواز
أنا مش عارفة العلاقة الكاملة بـ تحصل إزاي وخايفة منها
وحاسة إن الغشاء نفسه حابسني ومكتفني
هو ده بالنسبة لهم كل حاجة في البيت
لازم يفضل موجود

"ليه اختارتي موضوع البحث ده؟"
"لأني كنت عايزة أختار موضوع محدش اتكلم عنه وبـ يخافوا يتكلموا عنه"
"وانتِ بقي عينك واسعة وبجحة كفاية إنك تتكلمي عن الموضوع ده؟"
"أيوا حضرتك بس ده بحث علمي"

هي الست اتخلقت في مجتمعنا عشان المتعة بس؟
ولا لبس فارق، ولا وش خشب فارق، ولا إنك تكوني بـ تردي فارق
لو رديتي ده معناه إنك بـ تتـقلي
اكتشفت من قريب إن مفهوم المجتمع عن الست المتجوزة إنها أسهل!

لما خرجت، كان فيه ستات كتير من أعمار مختلفة على السلم،
وفى كل حتة، ومتجمعين قدام أوضة كده.

بابايا الـلـي قرر يعملها لي،
ولما ماما رفضت هددها إنها مش هـ تيجي تلاقيني في البيت،
وهو هـ ياخدني من وراها عند أي دكتور من صحابه يعملها لي.
كل الكلام ده عرفته بعد أكتر من 10 سنين بعد ما قطعوا جسمي.