الوصمة اللي حوالين زيادة الوزن صعبة ومؤلمة جدًا
كتير أوي كنت بروح للدكتور لأي سبب كان،
ولازم يجيب سيرة إن وزني زايد
"ضهرك واجعك؟ يمكن محتاجة تقللي من وزنك".
"عندك كحة؟ فكرتي تنزلي وزنك شوية؟".

أنا تقريبًا عمر ما حد اتريق على جسمي وشكلي إلا أهلي؛
بابا وماما ما كانوش بـ يتريقوا عليا، بس كانوا بـ يسمحوا لأعمامي يتريقوا عليا،
ويخلوني مضحكة القعدة لمجرد إن وزني زيادة شوية أو شعري كيرلي.
الجسم، التنمر

أنا كنت بـ كوي شعري على طول
وكنت مرتبطة، وبعدها ما حـصـلـش نصيب بينا
وبعد ما سيبنا بعض،
قررت إني أربي شعري الطبيعي وابقى حرة بطبيعتي
رجعت لـلـي كنت مرتبطة بيه زمان، وكويته مرتين عشانه
في مرة بقول له إني جاية له بشعري الطبيعي
قال لي بالنص: "نعم! جاية بيه كده ليه؟"

كنت متوترة جدًا لأني كنت زدت تاني تقريبًا نص الوزن اللي نزلته السنة اللي فاتت
بسبب اضطراب نهم الطعام ومشاكل القولون العصبي.
حاولت أهزَّر عشان أعدي الموقف وقلت:
"أنا تقريبًا محتاجة آخد إكس لارج"
فضحكت هي وقالت: "لأ دابل إكس لارج"

بابا كان بـ يضربني علشان أنا تخينة.
وانا 13 و14 سنة، ماما كان عندها يقين إني مش هـ تجوز
علشان أنا مليانة.

من وانا صغيرة بـ سمع تـلـقـيـحـات مش حلوة على شكلي وشعري،
ماما عمرها ما قالت لي إن شعري حلو

أنا بشرتي سمراء، وبحبها جدًا، ومن مصر، وأصلي نوبي، بس مش عايشة هناك.
بس عمري ما خلصت من تعليقات الناس في الشارع، أو المدرسة،
أو أي مكان بـ روحه،
زي: "شيكابالا"، "أعوذ بالله"، "هي مالها محروقة كده ليه؟"
العنصرية، التنمر، معايير الجمال، الجسم 

كنت دايمًا بـ اعمل شعرى
وأول ما بطَّلت أعمله، نزلت مرة مع ناس
كنت تريقة القعدة
لما روَّحت، لاقـيـتـهـم حاطين أغنية لبوب مارلي على الجروب بتاعنا
وبـ يـتـريـقـوا عليا.

أنا واحدة الحمد لله متصالحة جدًا مع نفسي، ومش بـ هتم بكلام الناس إطلاقًا.
بس حبيت أشارك الـلـي بـ يحصل معايا ومع غيري،
بس هم بـ يفرق معاهم، وبـ يوجعهم.
أنا واحدة حجم صدري صغير، فده ما يديش لحد الحق إنه يقولي:
"يا فلات" مثلاً،

بس فاكرة كويس أوي الكوافيرة لما كنت أقول لها إني عايزة أعمل شعري
ونظرتها أول ما اقلع الطرحة، وتلاقي شعري كيرلي
وتـلـقـيـحـهـا بالكلام على شعري مع باقي الناس الـلـي في المحل
ساعات كنت بـ حس إنها بـ تـتـعـمَّـد توجعني وهي بـ تـعـمـلـهـولي