أنا جت لي وانا في تانية إعدادي،
ماما قبلها بكام شهر كانت قعدتني، وحكت لي عن كل حاجة،
وعن تجربتها هي شخصيًا، وفهمتني معنى كل حاجة، واتصرف إزاي.
ولما جت لي كنت لوحدي، بس كنت عارفة أعمل إيه،
ولما ماما جت قلت لها حصل كذا كذا.
أخدتني، وعلمتني إزاي أنضف هدومي، وعلمتني الطهارة،
وإزاي آخد بالي من نظافتي الشخصية وقتها.
الحمد لله علي أمي؛ كنت بـ شوف صحابي محدش كلمهم في حاجة،
وكانو يلجأوا لي أشرحلهم يعملوا إيه.
الحمد لله أنا ربنا أنعمني بأم زي أمي، يا ريت كل الأمهات زيها.