أنا طول عمري وزني زايد، لدرجة إني مش قادرة أفتكر أي وقت ليا كنت رفيعة فيه.
شكلي الحمد لله حلو، وشعري جميل،
وشخصيتي وروحي حلوة الحمد لله،
بس الكلمة الـلـي طول الوقت بـ سمعها:
"لو تخسي شوية هـ تبقي قمر".

لدرجة إن حد من صحابي مرة قالي:
"لو خسيتي أنا هـ آجي اتقدملك من بكرة،
كل حاجة فيكي حلوة، بس موضوع التخن ده".
وقتها ما فهمتش، وما عرفتش مفروض أقوله إيه،
خصوصًا إني وقتها كنت بـ عتبره صديق مقرب جدًا،
وبحب دماغه وشخصيته جدًا جدًا،
بس بعد الجملة دي صورته اتهزت في عيني؛
ما بـقـيـتـش قادرة أشوفه الإنسان المُنفتح ولا المتحضر تاني.

اتجوزت بعد قصة حب، ووقتها سمعت كلام من نوعية:
"جوزها بـ يحب الرفيعين، بس عشان بـ يحبها اتجوزها، واتغاضى عن إنها تخينة".
كما لو كانت التخينة دي شخص مشوه ما ينفعش حد يبصله.

ده غير إنه كمان كان بـ يتقالي:
"لازم تخسي عشان تقدري تخلفي، بجسمك ده استحالة يبقى عندك ولاد".
بغض النظر عن إني خلفت مرتين، والمرتين كانوا مش متخطط ليهم بالمرة.

ده غير بقى نظرة البياعين في أي محل هدوم، غالي كان أو رخيص،
والكلمة الـلـي بـ تتقالك من قبل ما تبدأي تتفرجي حتى:
"للأسف يا فندم ما عندناش مقاسك"
كما لو كان عيب في أي محل إنهم يبيعوا هدوم للتخان.

أنا الحمد لله عمر التُخن ما أثر على صحتي،
وطول عمري حد نشيط جدًا، وبـ رقص، وبـ جري،
وبـ تنطَّط، وكنت بـ مثِّل أيام الجامعة،
ولو إني عمري ما أخدت دور محترم؛ بسبب إني تخينة،
حتى لو كنت أنسب واحدة في الكاست للدور، كان بـ يبقى دايما التعليق:
"لو أضمن إنك تخسي قبل يوم العرض هـ ديكي الدور".

أنا فعلًا دلوقتي وصلت لمرحلة عدم ثقة بالنفس رهيبة؛
بس بسبب تعليقات الناس السخيفة والمحبطة.